Alarmi në Komitetin Qendror: “Kanë dalë në ndjekje të gjithë forcat e policisë dhe të Divizjonit të Mbrojtjes që ndodhen këtu. Organizata e Partisë në qendër, Lushnje dhe Skrapar, ka mobilizuar anëtarët, kandidatët, të rinjtë komunista dhe miqtë e Partisë e të Frontit në këtë drejtim, duke zënë shtigjet nga mund të kalojnë ata, duke i dhënë informata ushtrisë për bazat e tyre”.
Një ngjarje e pazakontë kishte tronditur gjithë stukturat e regjimit komunist, në prillin e vitit 1947. Një grup të burgosurish që mbaheshin të izoluar, në një kamp në afërsi të Beratit, dhe shfrytëzoheshin për punë të detyruar, kishin sulmuar befas policët që i ruanin, i kishin çarmatosur dhe ia kishin dalë të arratiseshin së bashku me armatimin e marrë. Grupi prej 20 të burgosurish, konsiderohej si shumë i rrezikshëm për regjimin komunist dhe ishin dënuar të gjithë me nga 15 deri në 30 vjet burg. Për regjimin, ky akt ishte një kambanë alarmi. Të gjithë strukturat partiake e shtetërore ishin ngritur në këmbë për t'i kapur të arratisurit. Por, siç njoftojnë dy shkresat e mëposhtme, nga 20 të arratisurit, kishin arritur të kapnin vetëm njërin.
Ngjarja e mësipërme është përcjellë fillimisht si një telegram të nesërmen e ngjarjes dhe më tej, e detajuar, dërgohet në formë informacioni në Komitetin Qendror nga Reis Malile.
Kjo anë e medaljes në historinë e persekutimit komunist në Shqipëri është pak e njohur për publikun dhe dëshmon guximin e kundërshtarëve të komunizmit për ta refuzuar këtë regjim dhe metodat e dhunshme që ai aplikonte.
Arratisjet e bujshme vijuan pavarësisht masave të rrepta dhe dhunës së shtuar mbi të burgosurit politik. Dokumentat dëshmojnë edhe një arratisje tjetër të bujshme nga kampi me të burgosur politikë në fermën e Llakatundit, në dhjetor të po atij viti, dokument të cilin en.kujto.al do ta publikojë në ditën në vijim.
Më poshtë, sjellim të plota dy dokumentet ku zbardhet arratisja e 20 të burgosurve nga kampi i Beratit në prill të 1947:
18/IV/47
Tepër urgjent
nr.42/1
Komitetit Qendror të P.K.SH.
Sot në (17) shtatëmbëdhjetë datë 17.IV/47 gjatë rrugës që ktheheshin nga puna 20 të burgosur kriminelë lufte. Të burgosurit kanë çarmatosur policët që i shoqëronin. Ndjekja vazhdon. Deri tani kemi kapur vetëm një. Hollësirat do t’ju a dërgojmë me shkresë.
(Xhorxhi)
-----------------
Komitetit Qendror të P.K.SH
Tirane
Në vijim të radiogramit tonë nr 42/I datë 17/4/947.
Dje më 17 k.m. n’ora 17 mbas dite duke i prurë nga vendi i punimeve dhe afër kazermave në të hyrë të Beratit, u arratisën nga grupi i kriminelave politikë të këtij qarku 20 veta. Këta ju vërsulën rojeve që i shoqëronin në befasi dhe i çarmatosën duke marrë me vehte krejt armatimin e skuadrës që i shoqëronte.
Shumica kanë qenë kriminela të rrezikshëm të dënuar 15 deri në 30 vjet burgim. Nga hetimet që ka zhvilluar deri tani Drejtoria e Brendshme e Prefekturës nuk ka nxjerrë gjë në shesh nëse kjo çështje ishte e pregatitur me kohë nga ana e tyre , por sidoqoftë të le të dyshosh se kur u vërsulën ka qenë një shumicë e tërë.
Nuk dyshojmë që policët, të cilët i shoqëronin të kenë dashtë arratisjen e tyre, për arsye se ata u munduan së tepërmi për të mos ju lëshuar armët dhe fakti e tregon, që u kapën grykë më grykë me ta.
Kanë dalë në ndjekje të gjithë forcat e policisë dhe të divizjonit të mbrojtjes që ndodhen këtu. Organizata e partisë në qendër , Lushnje dhe Skrapar, ka mobilizuar anëtarët, kandidatë të rinjtë komunista dhe miqtë e Partisë e të Frontit në këtë drejtim duke zënë shtigjet nga mund të kalojnë ata duke i dhënë informata ushtrisë për bazat e tyre.
Do t’ju njoftojmë përsëri mbi këtë çështje.
(Reis Malile)
In case you are aware of crimes, victims or events related to the communist period in Albania, click here to publish it in our archive.