Prenk Calin edhe të lidhur, Mehmet Shehu  e kishte frikë për vdekje

Urdhri i 17 shkurtit/ “Jeni t’urdhnuem që me pasë nji kujdesi të veçantë në shoqërimin e kriminelit të luftës Preng Calin me shokë. Të jenë të lidhun mirë të siguruem n’automobil..”

Një ditë pasi komunistët kishin arritur ta thyenin  qëndresën e  luftëtarëve të Penk Calit e Llesh Marashit, Mehmnet Shehu ishte sërish si mbi gjemba. Ai dërgon një urdhër me urgjencë  përgjegjësit të partizanëve, që do të shoqërtonin Prenk Calin të lidhur nga Malësia e Kelmendit për në Shkodër. Shehu i porosit partizanët që të kenë shumë kujdes e ta mbajnë të lidhur mirë Prenk Calin dhe të tjerët në automobil për në Shkodër. Shehu i trembej ndonjë sulmi të beftë dhe arratisja e Prenk Calit do të ishte një goditje e rëndë për të dhe operacionin gjakatar që ai udhëhiqte në veri me urdhër të posaçëm nga Enver Hoxha. Dokumenti që sjell sot “Kujto .al” është i sunduar nga gjendja e ankthit. Për regjimin komunist kapja e Prenk Calit ishte fitorja më e rëndësishme, pas së cilës disi më lehtë do të depërtonin për të vijuar masakrat në popullsinë antikomuniste të veriut. Ja urdhëri i formosur nga Mehmet Shehu me 17 shkurt.

USHTRIJA N.ÇL.SHQIPTARE

VDEKJE FASHIZMIT

LIRI POPULLIT

KOMANDA E OPERACIONIT

Nr.extra.
Shkodër me 17/2/1945.

PËRGJEGJËSIT

Të partizanëve që shoqërojnë Kriminelin e Luftës Preng Calin.

P o z i t ë

Jeni t’urdhnuem që me pasë nji kujdesi të veçantë në shoqërimin e Kriminelit luftës Preng Calin me shokë. Të jenë të lidhun mirë të siguruem n’automobil. Të keni parasyshë që kur të mbrrijni në lagjen e parë të qytetit Shkodrës të zbriten nga automobili dhe në këmbë së bashku me shokët të drejtoheni për në Brigadën e II.Mprojtjes Popullit tue ndjekë rrugën kryesore të qytetit.

Ju kujtijmë se në tilla raste duhet të keni vëmendje të madhe, dhe në qoftë nevojë mund të kërkoni shtimin e forcës përcjellse, porositeni gjith-ashtu të keni kujdesi dhe në qytet.

Shtohet se gjaja ma kryesore asht që krimineli Preng Cali me shokë të jenë të lidhun mirë e të siguruem.

Pritet zbatimi i urdhnit pikërisht.

KOMANDANT’I OPERACIONIT

GJENERAL MAJOR

(Mehmet Shehu)

(firma)